راجے کہ بہ بیت گُنگ نہ مان اِیت نہ مان اِیت

دسته: بلوچی بهر
یک دیدگاه
دوشنبه - ۳ آبان ۱۳۹۵

راجے کہ بہ بیت گُنگ نہ مان اِیت نہ مان اِیت
مان اِیت پہ ادارُکّے بزاں زندگ ءَ مُردار

شھسسّائیں سید ءِ اے دوئیں بنداں چہ ما اندازگ جت کن ایں کہ زُبان پہ راج ءَ چنچو الّمی اِنت. زُبان تئی درشان ءِ وسیلہ اِنت. ھمے زُبان اِنت کہ انسان وتی ھر مارشت ءَ درانگاز کُت کنت. ءُ ھر راج وتی جند ءِ زُبان ءَ وتی درد ءَ, وشّی ءَ شرتر درانگاز کُت کنت. زُبان ءِ بستار چو ساہ ءَ اِنت. انچوش کہ ابید ساہ ءَ جسم بے مانا اِنت ھمے وڑ بے زُبان ءَ راج بے مانا اِنت.
یک زُبانے ھما وھد ءَ دیمروی کُت کنت کہ آئی ءِ گپ جنوک ءُ وانوک ءُ نبیسّوکانی کساس گیش بہ بیت. ءُ داں کہ زُبان دیمروی نہ کنت راج ءِ دیمروی دْروگیں گپّے. باز گْوش اِیت کہ زُبان ءِ دیمروی گوں راج ءِ دیمروی ءَ بندوک اِنت بلے من گْوش آں کہ راج ءِ دیمروی گوں زُبان ءَ بندوک اِنت. آ راجاں ھچ بستار نیست کہ دیمروی اِش کُتگ بلے زُبان اِش گار اِنت. مرچی وتی گپّانی جنگ ءَ دگرانی مُھتاج اَنت. زُبان ءِ دیمروی ءِ مستریں راہ ھمیش اِنت کہ گیش ءَ چہ گیش مردم وتی زُبان ءَ بہ وان اَنت ءُ بہ زان اَنت. ءُ گپ اے ھم نہ اِنت کہ مئے زُبان ءَ دیمروی نہ کُتگ. اِنچو بے آسراتی ءُ جنجالاں پد انگت آ دنیا ءِ ۹۹ می زُبان اِنت گُڑا بزان کہ آئی ءَ وتی ھدّ ءَ باز دیمروی کُتگ. بلے آ دیمروی ءِ کہ ما واھگدار ایں آ دیمروی دنیگا نہ بوتگ. ایشی ءِ مستریں سوب ادارہ ءِ نہ بیگ اِنت. لھتیں گْوش اِیت کہ ادارہ ھما وھد ءَ بیت کہ راج آجو بیت بلے بے آجوئیں کُرد مئے دیم ءَ اَنت کہ آیاں ھمے گُلامی ءِ زمزیلاں وتی زُبان چنچو دیم ءَ بُرتگ ءُ مرچی دنیا ءِ مزنیں زُبانانی لڑ ءَ گون اِنت.

مئے زُبان ءِ دومی دیمروی نہ کنگ ءِ نیمّون مئے سیاست اِنت. مئے سیاست ءَ زُبان ھچ وڑ ءَ بستار نہ داتگ. چوناھا زُبان ءِ دیمروی ءَ مستریں دست سیاست ءُ کار ءُ بار ئیگ اِنت. کار ءُ باری وسیلہ وَ ھَیر مارا نیست بلے سیاست ھست اِنت. بلے سیاست ءَ ھچ وڑ ءَ زُبان ءِ نیمگ ءَ دلگوش نہ داتگ. کُجام ھم پڑ ءِ ما وتی سیاست ءَ بہ چار ایں اود ءَ زُبان ءِ ھچ وڑیں بستار نیست. باید وَ ایش اِنت کہ انّوگیں سیاست کہ پجّار ءُ جند ءِ رکّینگ ءِ سیاست اِنت ایشی ءَ زُبان ءِ دیمروی نیمگ ءَ گیشتر دلگوش بہ داتیں بلے ما گندگ ءَ ایں کہ آیانی وتی جند ءِ راج ءَ گوں گپ دری زُبان ءَ اَنت. یک زانتکارے ءَ راست گْوشتگ کہ زُبان ءَ گپ جنوک زندگ کنت بزاں ھما زُبان زندگ مان اِیت کہ آئی ءَ گپ جنوک بہ بیت.

سَیمی مسلہ ایش اِنت کہ مئے زُبان ءِ مستریں جیڑہ کہ نبشتہ رھبند ئیگ اِنت آئی ءِ سر ءَ ھم دلگوش گْور کنگ نہ بوتگ. اے پڑ ءَ مستریں دلگوش سید ھاشمی ءَ داتگ. ابید ءِ سید ھاشمی ءِ کتاب بلوچی سیاھگ ءِ راست نبیسّگ ءَ دگہ چوشیں کتابے مئے کرّ ءَ نیست کہ ما آئی ءَ دنیا ءِ دیم ءَ پہ منّانک پیش داشت بہ کن ایں کہ مارا رھبند ھست. بلے ھمیشی ءِ سر ءَ ھم ما نا تپاک ایں. انچوش کہ زیا بلوچ گْوش اِیت کہ نبشتہ رھبند زُبان ءِ ساہ اِنت اد ءَ چہ زانگ بیت کہ نبشتہ رھبند ءِ ھم زُبان ءِ دیمروی ءَ یک بلاھیں بستارے ھست. زیا بلوچ ءِ وڑیں وانندگ ءُ زُبان زانتے ءِ گپ ءَ ما پاد لپاش کُت نہ کن ایں اے گپ بلاھیں گپّے پہ زُبان ءِ دیمروی واست ءَ. انچوش کہ تو یک پُلّے زندگ دارگ بہ لوٹ ئے بلے آئی ءَ آپ نہ دے ئے گُڑا آ چوں زندگ مان اِیت. ھمے وڑ ءَ اگاں ما زُبان ءِ دیمروی گپّ ءَ جن ایں گُڑا باید ھمیش اِنت کہ آئی ءِ نبشتہ رھبند ءِ ھم ھیال ءَ بہ دار ایں کہ آئی ءِ ساہ اِنت.

اے وڑیں جنجال مئے زُبان ءِ دیمروی ءِ راہ ءَ اڑاند اَنت. اگاں ما وتی زُبان ءِ دیمروی ءَ لوٹ ایں گُڑا باید اِنت کہ زُبان ءِ سرجمیں لوٹاں پیلہ بہ کن ایں گُڑا زُبان دیمروی کنت.


نوشته شده توسط:امید بلوچستانی - 134 مطلب
پرینت اشتراک گذاری در فیسبوک اشتراک گذاری در توییتر اشتراک گذاری در گوگل پلاس
بازدید: ۴۳۹
برچسب ها:
دیدگاه ها
عبدالرحمن مرادزاری جمعه ۲۵ فروردین ۱۳۹۶ - ۷:۴۵ ق.ظ پاسخ به دیدگاه

برنامه خوبیه